Wrestlemania 33 Comedy Coverage : Nanosecond Returns !!

[nanosecond]

Wrestlemania XXXII

مساء الخير بتوقيت .. nanosecond ♥♥♥

عاد ال Hardys .. فلم لا يعود مراقب عام الديفيدى أبضا ؟

مجرد الفكرة بعثت بالدماء الى عروقى و وجهى .. و لكن .. لم أتابع منذ سنوات فكيف أعود ؟

هل أكون مثل الروك و جيريكو ممن يعودون part time ؟ هل سأكون ضيف شرف يعتمد على تاريخه فقط مثل ريك فلير و بريت هارت ؟

هل بعودتى سأنقص من تاريخى ؟

هل انتهت مسيرتى قبل آوانها .. أم كان الوقت المناسب لترك المبنى (المنهار) فى أوج مجدى مثل مصارعى المفضل شون مايكلز ؟

لا أدرى .. فقط أريد ..

One More Match !!!

نبدأ المشاركة القادمة ان شاء الله

[nanosecond]

~~ الكواليس ~~

تصل سيارة فارهة الى المبنى .. تخطف الأبصار و تتعلق بها أبصار الجميع ..

تتوقف أخيرا .. ينفتح الباب ..

"♪♫ يا بتاع النعناع يا منعنع .. يا منعنع .. يا منعناااااااااع ♪♪"

" أيواااا أيواااا ببـــــــــــــس .. ببــــــــــــــــس ..

معايا السبورت و الكندا دراااااااى .. "

و هنا يفتح كوفى كينجستون زجاجة من المياة الغازية ب"فتاحة" بدائية و يقدمها الى نيكى بيللا

" ببــــــــــــــــس يا أبلة ؟ "

" تسلم يا كوكو "

ينضم اليه بقية فريق ال new day و يقدمون لها الفيشار و الآيس كريم ..

" طب و بالنسبة لى أنا ؟ "

يتجاهل جون سينا الجميع و يستمرون بالمزاح ..

نيكى بيللا : مفيش طب بالفراولة ؟

كوفى كينجستون : يا سلام بس كده يا قمر ده لو مفيش نزرع لك هنا فراولة مخصوص و نعملهولك طازة

بيج اى : من دلوقتى بيستخسر فيكى التوكتوك اومال بعد كده هيعمل فيكى ايه .. شكلك يا عينيا جاية فى الحر دا سيرا على الأقدام ..

نيكى بيللا : آه و النعمة

سينا : ايه سيرا على الأقدام دى كمان !

ينظر اليه الجميع شزرا ثم يكمل وودز محدثا نيكى ..

وودز : دا علام متوسط و لا ايه يا نيكى يا أختى سألتى عليه الأول ؟

نيكى بيللا : سألت يا أخويا سألت .. قالولى راجل كسيب

بيج اى : أنا شايف انك تعيدى نظر يا مزمزمازيل نيكى انتى لسه ع البر يا حبيبتى الحقى نفسك قبل الفاس ما تقع فى الكراس

سينا : لا لحد هنا و ستوب !

الأول قولت كندا دراى و سبورت كولا و عديتها ..

و بعدين سيرا على الأفدام ..

فاس ايه اللى هتقع فى الكراس ! اسمه كشكول يا جاهل

كوفى كينجستون : كمان مش عارف أمثال شعبية

سينا : ششششت هات يلا واحدة سبورت مشبرة من جنبك

كوفى كينجستون : سبورت ! دا قديم موت موت موت دى اتلغت من زمان دلوقتى فى شويبس و شويبس جولد و كوكا كولا ..

وودز : و بيبسى كولا

بيج اى : و جيلى كولا

كوفى كينجستون : عارف فى كمان سينا كولا بس مفيش اقبال عليه

سينا : نعم ! عامة مش فايق لكوا ياللا يا بت من هنا ..

كوفى كينجستون : ايدك يا معلم سيبها مفيش رجالة فى الاتحاد و لا ايه انت مفيش بينك و بينها حاجة رسمى و ملكش كلام عليها

وودز : عارفة يا أختى لما فترة الخطوبة بتطول مش حاجة تطمن خالص

بدلا من الغضب تلين ملامح سينا تماما و تملأ وجهه ابتسامة عريضة

بيج اى : أيوه كده ارجع يا باشا فرفوش كده زى زمان

يتجاهله سينا و يوجه كلامه الى كوفى كينجستون

سينا : ألا قولى صحيح يا نجم

كوفى كينجستون : اؤمر يا كبير

سينا : انت جايب منين السبورت كولا و الكندا دراى دول ؟

كوفى كينجستون : دا سر المهنة يا باشا

سينا : عليا بردو يا صاحبى

كوفى كينجستون : لا لا طبعا .. بص كل الحكاية دول عندنا من زمان أبويا بيتاجر فيهم و لما ربنا فتحها عليه و بقى يبيع سفن أب و سبرايت و حاجات اليومين دول أداهومنى أسترزق بيهم ..

بصراحة كان مقلبهم من كشك زمان شربهم و مرجعهمش عشان مكانش معاه فكة ..

سينا : و ليه ماجتليش و أنا أفك لك

كوفى كينجستون : أصل الدائرى كان واقف

سينا : حبيب قلبى ... ههههههههههههههههههههههههههه

بيج اى : أيوه كده ارجع يا باشا فرفوش كده زى زمان

يتوقف سينا عن الضحك و يلتفت اليه غاضبا

سينا : أنا لسه سامع الجملة دى من شوية .. صح ؟

كوفى كينجستون : معلش يا باشا عليا أنا المرة دى

سينا : سيبنى يا عم كوفى أفهمه .. هو أنا ماقلتلكش ؟

بيج اى : ها ؟

سينا : فإذا ظهرت لك نيوب الليث بارزة فلا تظنن أن الليث يبتسم

بيج اى : يا نهار أسود متأكد من الكلام دا يا كبير ؟

وودز : طلع علام مش متوسط

سينا : العيال دى تلزمك فى حاجة يا كوفى ؟

كوفى كينجستون : و لا أعرفهم يا كبير دول فجأة لقيتهم معايا و مش عارف أخلص منهم

سينا : اشطة .. ناولنى واحدة سبورت كده من جنبك

كوفى كينجستون : أحلى سبورت للبطل اتفضل يا باشا

يأخذها سينا و يقوم بكسرها لتصير "رقبة ازازة" و يقترب شيئا فشيئا من" بيج اى" و "وودز"

سينا : حد فيكوا شاف فيلم الهاربة قبل كده

وودز : بتاع شادية و رقبة الازازة

سينا : أيوااااااا

وودز : طب و النعمة انت أحسن منها مليون مرة يا باشا .. راح فين قلبك الكبير

بيج اى : آه يا ريت كده ترجع يا باشا فرفوش كده زى زم..

لا يكمل المسكين عبارته فقد تم تكسير جميع زجاجات المياة الغازية فوق رأسه

سينا : معلش بقى يا عم كوفى

كوفى كينجستون : لا لا يا باشا و لا يهمك أنا كنت عايز أخلص منهم من زمان و أغير النشاط

سينا : أنا عارف ايه اللى رماك ع الشغلانة دى بس

كوفى كينجستون : آهو أكل العيش مر و الست ستيفانى كتر خيرها انها لقيت لى الشغلانة دى بدل ما سيدى اتش كان هيقعدنى فى البيت خالص

سينا : معلش يا كوفى يا أخويا .. مسيرها تضبط

وودز : هنكمل الليلة كده ازاى من غير بيج

سينا : يا عم و لا يهمك نصاية ابعت أجيب لك أخوه التوأم و لا حد هياخد باله

المهم ياللا بقى أحسن اتأخرنا .. ايه ده البت نيك راحت فين !

يتلفت سينا حوله ليجدها جالسة على على بعض خطوات بين الميز و ماريس (كل واحد ماسك ودن كل واحد بيقولها جملة ) .. يقترب شيئا فشيئا

ماريس : و اوعى يضحك عليكى و يجيب لك دهب صينى آه .. شوفى الميز حبيبى جاب لى دهب يابانى ..

الميز : و اوعى يقولك معاييش ده المكافآت نازلة عليه ايــــه .. أنا أعرف ناس هنا فى المالية و ال HR حبايبى لو تحبى أجيب لك شريط القبض بتاعه تشوفه بنفسك

ماريس : و الفرح ع العريس

الميز : انتى عليكى الأجهزة بس خلليه هو يجيب الستاير

سينا : طب و الكوفرتينا على مين ؟

تنتفض نيكى و تقف

نيكى بيللا : يا لهوى سى سينا

سينا : بتعملى ايه هنا يا بت

تهمس ماريس اليها : و لا يهمك منه ردى عليه زى ما قلت لك

نيكى بيللا : شوف بقى .. اللى أوله شرط آخره كارت .. قصدى آخره .. مش فاكرة .. المهم يعنى ..

من الآخر كده .. ملكش كلمة عليا غير لو بينا حاجة رسمى .. لا ليك دعوة حد يدينى حاجة ساقعة و لا آيس كريم و لا أكلم مين و لا ماكلمش مين .. بس كده

سينا : بت يا نيك !

الميز : لو سمحت اسمها مودمازيل نيك

سينا : بس يا بابا

نيكى بيللا : ماريس و ميز كان عندهم حق .. كان عندهم حق ..

تربت ماريس على كتفها و تأخذها مع الميز و ترحل أمام دهشة سينا

-------------

مشهد آخر ..

تريبل اتش : ضهرى يا بت مش قادر أقوم

ستيفانى : حد قالك تتمرن قبل الماتش بنص ساعة

تريبل اتش : ماينفعش أبعت حد بدالى ؟

ستيفانى : كله يا معتزل يا انت مقعده فى البيت

تريبل اتش : استنى استنى عرفت هبعت مين

يطلب رقما ما

تريبل اتش : الواد دا راح فين مابيردش !

ستيفانى : قصدك شون ؟

تريبل اتش : هو فى غيره ؟

ستيفانى : هو و البت اللى ما تتسمى ليتا اختفوا من ساعة الفقرة بتاعتهم اللى قبل العرض المباشر

تريبل اتش : نعم يا أختى ! انتى السبب لو مكانش خد حسابه كامل مقدم زى كل سنة مكانش عمل كده .. بس لما أشوفه

ستيفانى : طب و بالنسبة للبت ليتا عادى ؟

تريبل اتش : يوووه .. اصبرى بس .. هكلم الباشا .. طبعا لسه ماجاش لحد دلوقت

يرن هاتفه المحمول فى نفس ذات اللحظة قبل أن يطلب الرقم

تيكر : عايز ايه ياض ؟

تريبل اتش : لا لا يا باشا مفيش حاجة

تيكر : يعنى ايه مفيش حاجة ؟ بعد ما دوشتنى تقولى مفيش حاجة !

تريبل اتش : انت قدامك قد ايه و تبقى هنا ؟

يأتى الرد على هيئة قفاز تيكر الأسود يخرج من سماعة الهاتف ليقوم بشوك سلام سريع لتريبل اتش فيسقط أرضا لتلتقط ستيفانى هاتفه المحمول من على الأرض و تكمل المكالمة

ستيفانى : أيوه يا باشا حقك عليا غشيم معلش مفيش فايدة فيه

تيكر : ربنا يصبرك يا أختى .. المهم قوليلى كان عايز ايه بقى .. ممكن أساعده عشان خاطرك انتى بس

ستيفانى : لا لا يا باشا هو يستاهل اللى انت عملته

تيكر : هو ليه ماتش النهاردة ؟

ستيفانى : أه مع الواد رولينز

تيكر : مش هوصيكى بقى

ستيفانى : عونيا

تيكر : تسلم لى عينيكى يا قمر .. المسقعة بتاعت كل سنة جاهزة ؟

ستيفانى : طبعا يا باشا .. أول ما توصل هتلاقيها فى الميكروويف سخنة فى أوضتك تاكلها قبل الماتش و تفرم الواد رينز ده

تيكر : تسلم ايديك يا جميل .. معلش أسيبك بقى عشان أقيس البالطو الجديد بتاعى

--------------------------

خارج الاتحاد و فى أحد السيارات الفيات ال 128 ..

جيف هاردى : ولا يخرب بيتك انت جيبتنا فين

مات هاردى : ايه ياض ما أنا ماشى قدامك ع ال GPS آهو

جيف هاردى : يعنى متأكد اننا كده وصلنا أصلى بشبه ع المكان ده

مات هاردى : يا عم يمكن ديكسى عملت تجديدات فى الديكور و لا حاجة .. انزل بقى و انجز نسيتنى الكلمتين اللى هندخل نقولهم ..

يكذب جيف احساسه و يقوم بركن سيارته و يترجل منها الى جانب أخيه مات هاردى

ما أن يراهما حارس الأمن حتى يهتف فى سعادة و الدموع فى عينيه

" معقول .. سى جيف و سى مات .. حمد الله ع السلامة .. يااااااااه ده الرجالة هيفرحوا أوى ..

يا متولى .. يا عبد الجبار .. تعالوا بسرررررعة "

جيف هاردى : عم زناتى .. انتوا اتعينتوا هنا امتى ؟

مات هاردى : يمكن ديكسى عايزة تعملها لنا مفاجأة

عم زناتى : هو العيال دى مالها جرالها ايه يا عينى شكل الزمن جه عليهم أوى

جيف هاردى : بتقول حاجة يا عم زناتى ؟

عم زناتى : لا لا مفيش يا جيف بيه اتفضلوا اتفضلوا البيت بيتكوا

يدخل كلا من جيف و مات و يقابلهم فى الطريق ..

كريس جيريكو : ايه ده معقول لا مش معقول

جيف هاردى : جيرى ! لسه بتغنى ياض

مات هاردى : شكل ديكسى عملت تغييرات كتير من غير ما نعرف

كريس جيريكو : ديكسى ! انت ايه اللى جابك هنا ياض انت و هو ؟ الاتحاد بتاعكوا ده عمال يبعت لنا الناس اللى عنده انتوا ضربتوا تفليسة و لا ايه ؟ شكل البت ديكسى دى لعبت فى البورصة

جيف هاردى : انت اتجننت ايه اللى انت بتقوله ده

مات هاردى : شششت خلاص ياض شكل عقله خف يا عينى مش شايف الكوفية اللى لابسها و فيها لمض زينة بتنور و تطفى

جيف هاردى : يا ضنايا يا بنى .. ليك حق ياض شكل ديسكى عينته شفقة طول عمر قلبها كبير

كريس جيريكو : بتقول ايه ياض منك له ؟ عامة أنا مش فاضى لكوا عندى ماتش

-------------------------

يستمر جيف و مات فى السير و لم يكتشفا بعد وجودهما فى ال WWE بدلا من ال TNA .. الى أن يجدهما ..

شين ماكمان : معقول اللى أنا شايفه ده ! الهارديز !!!!!!!

جيف هاردى : مين ده بشبه ..

مات هاردى : شيـــــــــــــــن .. ازيك ياااااااض واحشنى

شين ماكمان : يخرب عقلكوا يا عيال .. جيتوا ازاى ؟

جيف هاردى : بعربيتى ؟

شين ماكمان : ههههههههههههه .. لسه بتقلش بردو ياض .. المهم بقى انتوا جيتوا فى اليوم الصح تحبوا بقى تلعبوا على حزام ايه ؟

مات هاردى : يعنى كله منك بركة يا كبير

جيف هاردى : شين هو انت أبوك و أختك طردوك من الاتحاد ؟

شين ماكمان : ههههههههههههه .. يطردوا مين يابا

جيف هاردى : مش انت الباشا غلبك السنة اللى فاتت فى المينيا ؟

شين ماكمان : آه و ساعتها كان الاتفاق لو خسرت مش هبقى مدير الراو بس كده .. المهم سيبكوا من دا كله هروح ماتش مع الواد ايه جيه ستايلز فى السريع تكونوا فكرتوا عايزين تلعبوا ماتش ايه

يتركهم و يرحل ..

جيف هاردى : ايه جيه ستايلز ! الواد ده مختفى من فترة من ساعة ما خزنة الاتحاد اتسرقت !

مات هاردى : جيف .. أنا عايز أعترف لك بحاجة .. أنا شاكك انى ..

جيف هاردى : انت تخرس خالص !

--------------------------------------------------------

نيكى بيللا فى غرفتها الخاصة .. جون سينا مستمر بالطرق على الباب ..

سينا : خلاص بقى يا بت ما أنا اعتذرت لك

نيكى بيللا : لو مامشيتش دلوقتى يا أستاذ سينا هضطر أنده الأمن

سينا : لا و على ايه .. المهم ماتنسيش تيجى الماتش

نيكى بيللا : ماتقلقتش .. business is business

تنتظر حتى يرحل ثم تطلب رقما ما ..

نيكى بيللا : مشى يا ماريس مشى !

ماريس : اجمدى يا بت .. هتروحى النهاردة و دبلته فى ايدك .. المهم اعملى اللى قلت لك عليه ..

نيكى بيللا : طيب ربنا يستر .. هى مامته طيبة و بتحبنى و كل حاجة بس ..

ماريس : مابسش ! ياللا انجزى .. أنا ما صدقت أقنع الميز اننا نخسر النهاردة عشان خاطرك

نيكى بيللا : عمرى ما هنسى وقفتكوا جنبى والله ..

-------------------------

[nanosecond]

مات هاردى : واد يا جيف استنى .. يمكن احنا مش فى ال TNA فعلا أنا مش فاكر كتبت ايه فى ال GPS

جيف هاردى : مليون مرة أقولك متضربش دوا كحة و احنا داخلين على بطولة .. و أنا اللى أدفع التمن .. مفيش أى حد عارفه خالص اسأله و أفهم احنا فين .. مفيش قدامى غير حل واحد ..

" لاءااااااااااااااااا "

جيف هاردى : الصوت ده أنا عارفه

مات هاردى : اورتن حبيب قلبى لسه مصدع بردو

اورتن : انتوا بجد و لا تهيؤات

جيف هاردى : بجد يا عم .. مالك يا بنى مين مزعلك المرة دى

اورتن : لا لا .. انتوا مش بجد ..

ينقطع النور و يأتى براى وايت ممسكا بمصباحه

براى وايت : الأخت أبيجايل ستنتقم .. الأخت أبيجايل ستنتقم .. و ها قد بدأت يا أورتن تهذى برؤية أصدقائك القدامى الهاردى بويز ..

جيف هاردى : هو فى ايه

مات هاردى : واد يا جيف اوعا نكون أشباح

براى وايت : انها اللعنة .. انها اللعنة .. هل ترى شعر صديقك مات هاردى نصفه أبيض و نصفه أسود .. سيتحول الى رويلا فى فيلم مائة كلب و كلب و ستجرى ورائك الكلاب ال 101

هنا يبدأ جيف بالتحديق الى اورتن ليخيفه

اورتن : لاااءاااااااااااااااا

يعود النور فلا نجد أثرا لا لأورتن و لا براى وايت ..

جيف هاردى : شكلنا جينا مصحة أمراض عقلية و لا ايه ..

لحظات و يصرخ مات مفزوعا

مات هاردى : لااءااااااااا

جيف هاردى : فى ايه ياض أنا مش ناقص

مات هاردى : بص بص هناك ..

جيف هاردى : ايه ده .. مش دا بيل جولدبرج .. شكلنا اشباح فعلا يا واد .. هى ديسكى عملت علينا تعويذة و لا حطت لنا حاجة امبارح فى سندويتشات الكبدة و لا ايه .. كل ده عشان طلبنا زيادة فى المرتب ..

مات هاردى : بقولك ايه تعالا نهرب

جيف هاردى : اوووباااا .. لا استنى ع الهرب شوية شكل القعدة هتحلو

يقولها و تتسع ابتسامته فيتطلع مات الى حيث ينظر ليجد ..

جيف هاردى : يا أرض اتهدى ..

شارلوت فلير : لم نفسك يلا لأغزك

جيف هاردى : أموت أنا

مات هاردى : بس ياض .. احنا آسفين يا أنسة ..

شارلوت فلير : ايه ده .. ماتى هاردى ♥♥♥ .. شعرك الشطرنج ده تحفة عليك

جيف هاردى : طب و بالنسبة لى أنا

تنظر اليه شزرا فيكمل مات قائلا

مات هاردى : بجد يا مودمازيل ؟

شارلوت فلير : طبعااااا .. انت فى حد قالك غير كده و لا ايه ؟

مات هاردى : لا لا ماتخديش فى بالك يا آنسة .. ؟

شارلوت فلير : شارلوت ..

جيف هاردى : أموت أنا

مات هاردى : ولا غور من هنا .. اتفضلى يا مودمازيل ادخلى الماتش بتاعك و ده رقمى لما تخلصى يا ريت نتواصل ع الواتس ..

تأخذ الرقم و تبتسم ابتسامة عريضة بينما ترمق جيف بنظرة نارية متوعدة ..

يراقبون دخولها ..

جيف هاردى : ولا .. هى مش دى موسيقى دخلة عمك فلير بردو ؟

مات هاردى : ايه يا عم عادى اقتباس فنى برئ ..

جيف هاردى : هى ماشية كده ليه زيه و روب الطاووس و الفرو ده اللى لابساه ده .. البت دى بتقلده بالضبط

مات هاردى : يا عم عادى واخداه قدوة ليها ايه المشكلة ماتنساش عمك فلير بيساعد الشباب نسيت عمل ايه معانا ..

و هنا يسمعون اسمها عاليا فى التعليق :

Charlotte Flair

جيف هاردى : هتقولى تشابه أسماء !

مات هاردى : يا عم عادى واخده اسمه كده ايه المشكلة يعنى ..

جيف هاردى : احنا لا أشباح و لا رجعنا الماضى شكلنا فى المستقبل و البت دى بنت ريك فلير بجد

مات هاردى : ماتكبرش الحكاية .. بس ايه الديفاز الهبل دول يا جدع .. اللى شعرها أخضر و اللى شعرها فوشيا .. و الهبلة اللى معاها الحزام دى شكلها خارجة من البوكيمون .. فين أيام زمان ..

جيف هاردى : بقولك ايه .. تعالا ندور على حاجة ناكلها و ندور على أوضة الواد شين نستناه نلعب الماتش و نقبض و تنينا ماشيين من اتحاد المجانين ده ..

------------

عودة الى اتش و ستيفانى ..

تريبل اتش : طلبتى UBER يا بت ؟

ستيفانى : طلبتهم .. افتكرونى بهزر لما قولت لهم ان تريبل اتش عايز توصيلة من اوضته لحد حلبة المصارعة

تريبل اتش : ليه يعنى ؟ شكلهم مش عايزين يشتغلوا .. طلبتى كريم طيب ؟

ستيفانى : آه .. نفس الكلام ..

تريبل اتش : طب و العمل .. مش قادر امشى خصوصا بعد الشوك سلام بتاعت الباشا .. حسابه معايا بعدين .. طب كلمى الواد أخوكى ييجى يوصلنى

ستيفانى : متكوم فى أوضته من ساعة الماتش بتاعه مع الواد ستايلز ..

تريبل اتش : و الواد شون لسه مابيردش .. بس لما أشوفه .. كده مفيش قدامى غير حل واحد

ستيفانى : لا بتهزر .. !

دقائق و بالفعل يستخدم تريبل اتش احدى السيارات الديكور للدخول الى الحلبة كما رأينا جميعا :d

-------

نيكى بيللا : ألو .. أيوه يا طنط وصلتى ؟

والدة جون سينا : أيوه يا حبيبتى .. أنا و العيلة كلها جينا لما نشوف حكاية الواد ده .. لو مكتبش عليكى النهاردة لا ابنى و لا أعرفه ..

و بالفعل يتم المراد و يتقدم جون سينا رسميا للزواج من نيكى بيللا

------------

يستعد جيف و مات للمباراة .. ثم يلمحون ..

جيف هاردى : ايه ده .. شوف مين البت اللى ماشية هناك مع ناتاليا دى

مات هاردى : ميكى جيمس !!!! مش دى اللى اختفت بردو مع الواد ستايلز لما الخزنة اتسرقت !

بت يا ميكى .. انتى يا بت !

جيف هاردى : شافتنا و بتهرب !

مات هاردى : بعد ما الماتش يخلص هناخدها هى و ستايلز و نروح على مكتب ديكسى كارتر عدل

بالفعل يدخل كلا من جيف و مات الى الحلبة وسط ترحيب الجماهير ..

و لازالوا لا يعلمون الحقيقة :d

----------

يصل الآن تيكر الى غرفته .. يفتح الميكروويف ..

ليجد المسقعة باردة و لا كهرباء فى الغرفة !

تيكر : البت دى بتهرج و لا ايه ! الماتش خلاص هيبتدى !

يجرب رقمها ..

تيكر : و كمان مابتردش !

و هنا يرن هاتفه ..

تيكر : ايه ياض انت خارج مع البت عشان تخلص لها الرصيد مابتطلبش من موبايلك ليه ؟

شون مايكلز : ايه يا عم ادينى فرصة أعبر عن نفسى بس .. الحق عليا متصل ألحقك ..

تيكر : طب ادينى البت ليتا أسلم عليها الأول

شون مايكلز : مفيش وقت ياض .. بص أنا بكلمك من رقم ليتا عشان الواد المدير اتش ده كان مكسل يلعب الماتش بتاعه مع الواد رولينز و عايزنى أساعده و أنا مكانليش مزاج أبهدل نفسى السنة دى الصراحة

تيكر : طب و باقى حسابك ياض

شون مايكلز : لا ما أنا كلمت ستيف ضبطتنى أقنعته يدينى حسابى كامل من قبل الفقرة بتاعتى اللى قبل العرض قبضت و خدت البت ليتا و روحنا على لابوار خلصنا ع الكحك و الغريبة كلهم و هنطلع بعديها على ماندارين قويدر ناكل آيس كريم زبادى بالتوت

تيكر : ولا اوعا تروحوا قويدر غير لما أخلص الماتش و آجى معاكوا

شون مايكلز : خلاص اشطة بس انت ماتطولش

تيكر : صحيح انت كنت متصل ليه و عايز تلحقنى ليه .. ألو .. ألو ! يخرب بيت فقرك خلصت الشحن .. مفيش وقت .. شكل الواد صاحبك المدير عامل فيا عملة سودة و انت عايز تحذرنى .. عامة أنا هاخد حذرى و احتياطى أحسن شامم رياح الغدر ..

يتأمل تيكر المسقعة الباردة فى حسرة .. ثم يتركها ليدخل الى مباراته مع رومان رينز ..

-------------------------------

ليتا : ملحقتش تحذره ؟

شون مايكلز : انت هبلة يا بت ؟ مين قال انى كنت ناوى أقوله أصلا ! زى ما اعتزلت بسببه هخلليه يعتزل النهاردة هو كمان ..

ليتا : يااااه قلبك أسود أوى يا شونتى انت مش قلت لى الموضوع كان بمزاجك و كنت متراضى

شون مايكلز : آه عشان صعب عليا لما قالى مش عايز الستريك تتكسر .. بس ييجى بعد كده يسيب الواد ليسنز يكسرها عشان قرشين زيادة لأ

ليتا : معلش بقى يا شونتى انت عارف مصاريف البيت و العيال

شون مايكلز : يوووووه .. ماتخلليش قلبى يحن يا بت

ليتا : لسه فى وقت

شون مايكلز : طيب .. أمرى لله .. أعمل ايه بس فى قلبى الطيب .. بس يا رب نلحقه ..

--------------

جيف و مات أثناء المباراة ..

جيف هاردى : ولا ولا ايه المصارعين دول كلهم هنعمل ايه

مات هاردى : والله ما أنا فاهم حاجة الواد شين دا شكله ورطنا

جيف هاردى : المشكلة انى مش عارف حد فيهم هما اتنين اللى بشبه عليهم اللى عاملين من اسكتلندا دول .. هو واحد فيهم يجيب بس التانى دا مش مدى خالص

مات هاردى : اوعا دول جايين ناحيتنا

جيف هاردى : طب بص هقول لك حاجة احنا ندور الضرب فيهم و نحمى ضهر بعض لحد ما الماتش يخلص , اشطة ؟

مات هاردى : تمام

و بالفعل يستمرون فى فعل ذلك .. الى أن يوجه جيف سؤالا جوهريا الى شقيقه الأكبر :

جيف هاردى : صحيح السلالم دى كلها مرمية هنا ليه ؟

مات هاردى : مش عارف أنا لاحظت دا فعلا .. بقالنا زمن ملعبناش ياض لتكون حاجة فى القوانين

جيف هاردى : خلاص يا عم ملناش دعوة

مات هاردى : الحق الاتنين دول بيعملوا بيها كوبرى

جيف هاردى : ايه شغل الأطفال دا !

مات هاردى : فكك منهم تعالا نكمل و خلاص لما نشوف آخرتها

بعد قليل يلاحظ مات وجود أحزمة التاج تيم معلقة بالأعلى ..

مات هاردى : واد يا جيف الحق حاطين حزامين متعلقين فى السقف !

جيف هاردى : تنظيم زبالة .. و لو انى فاكر انى شفت الكلام ده قبل كده بس فين مش فاكر

مات هاردى : المهم دلوقتى أنا هاخد لى سلم و أحاول أجيبهم تعالا احمى ضهرى

جيف هاردى : لا يا عم أنا نفسى أطلع و أنط من ع السلم ده زى زمان لما كنت فى ال WWE

مات هاردى : تصدق أنا غلطان انى جيبتك معايا .. غور يلا ..

يتركه مات ليتسلق السلم و يأخذ الألقاب .. بينما يقفز جيف بالفعل من على السلم ليسقط على شيماس مانعا اياه من الوصول الى مات :p

مات هاردى : كسبنا يا وااااد كسبناااا

جيف هاردى : أصيل الواد شين حط لنا حزامين و الاتنين زى بعض بالضبط عشان مانتخانقش

يحتفلان بالألقاب .. و هنا يسمعان التعليق معلنا فوزهما

جيف هاردى : ولا مش دا صوت البت ليليان جارسيا ؟

مات هاردى : لا يا عم و هى ايه اللى هيجيبها هنا بس .. المهم أنا مستغرب أوى ديكسى كارتر مش باينة خالص

جيف هاردى : المهم احنا دلوقتى نطلع نحتفل بره مكان المجانين ده قوام

مات هاردى : اشطة .. نروح بس ناكل حاجة خفيفة من الكافتريا و نسلم ع ال fans

--------------------------------

يصل شون و ليتا أخيرا .. و يلعب القدر لعبته ..

مات هاردى : ايه ده شايف اللى أنا شايفه يا ولا ..

جيف هاردى : لا لا مش ممكن .. دى هى البت ليتا اللى مع شون مايكلز !

مات هاردى : بقولك ايه .. احنا لازم نهرب من هنا بسرعة أنا خايف لو قعدنا أكتر من كده نلاقى ايدج و فيكى و كين و هوجان

جيف هاردى : هوجان تبعنا يا عم .. طب ما تيجى نسلم على ليتا

مات هاردى : ولا قدامى ع العربية .. أناا للى هسوق و انت افتح ال GPS

بس اوعا ألاقى نفسى فى ال WWE عارفك هتتجنن و ترجع هناك

جيف هاردى : لا يا عم يا ريت .. أيام و راحت لحالها

ينطلقان مسرعين و يلمحهما كلا من شون و ليتا ..

ليتا : مش دول الواد مات و جيف !

شون مايكلز : هما شبههم آه بس مش ممكن .. تعالى بس نلحق الباشا دلوقتى أهم

---------------------------

فى تلك الاثناء .. رومان رينز فى غرفته

رومان رينز : ايه اللى أنا عملته فى نفسى ده بس .. هتفرم يا جدعان ..

الباشا طلع قلبه أسود فعلا .. مش قادر ينسى أيام مركز شباب الجزيرة زمان لما دخلت فيه جون ..

يا ريتنى غيرت اسمى مكانش هيعرفنى .. لازم يعنى يسيحوا لى و يقولوا انى كنت بلعب كورة قدم قبل المصارعة كان زمانى قلت ده تشابه أسماء .. أعمل ايه دلوقت .. و العيال الأندال اللى كانوا عاملين معايا فريق سابونى .. الواد أمبروز غلبان هو الواد السوسة رولينز دا السبب .. عموما أحسن آهو وقع مع المدير اللى كان متحامى فيه و مش معنى أنه كسب النهاردة ان اتش هيسيبه ..

تريبل اتش : عفارم عليك ياض ..

رومان رينز : ايه ده انت هنا من امتى يا مدير !

تريبل اتش : طبعا عمال تكلم نفسك و لا واخد بالك انى دخلت من بدرى و عملت واحد كابوتشينو كمان

رومان رينز : طب أبوس ايدك يا باشا كله الا الماتش ده مستقبلى هيضيع

تريبل اتش : ماتخافش ياض .. أنا هخلليك تكسب

رومان رينز : ايه ! بس الست ستيفانى ..

تريبل اتش : ششششت .. ملكش دعوة بالست ستيفانى .. حصل تغيير فى الخطة

رومان رينز : بس ..

تريبل اتش : انت النهاردة هتدخل التاريخ يا منعم .. بالاذن أنا عشان تلحق تدخل التاريخ قصدى الحلبة

رومان رينز : يا مدير ! تعالا ارجع فهمنى مش فاهم حاجة !

تريبل اتش خارجا من غرفة رومان رينز .. يقابله ..

تريبل اتش : أهلا أهلا بالباشا .. ما بدرى .. لسه ع الماتش خمس دقايق و انت دخلتك لوحدها بتقعد نص ساعة .. لا و بتاخد عليها مرتب كمان !

يقابله تيكر بالسنيك آيز .. و لكنها لم تكن بقوة كافية نتيجة عدم تناوله سر قوته فى المينيا كل عام : مسقعة ستيفانى

يتركه مكملا طريقه ليدخل الى الحلبة .. فيصيح تريبل اتش ساخرا ..

" صحيح يا باشا .. ستيف خسرتنى الماتش زى ما اتفقتوا عليا انت و هى .. بس آهى مرمية دلوقتى مش قادرة تتحرك و معرفتش تسخن لك المسقعة .. صحيح .. ماتبقاش تنسى تدفع فاتورة الكهربا أحسن اضطرينا نقطع النور عن أوضتك .. ها ها ها ها ها "

ضحكات شريرة متقطعة

و هنا يتنبه تيكر لما فعله اتش .. و لكن بعد فوات الآوان ..

يصل شون و ليتا أخيرا .. و لكن بعد فوات الآوان أيضا ..

ليتا : أنا .. هحاول أدخل ألفت انتباهه بأى طريقة

يبتسم اتش ساخرا ..

شون مايكلز : ايه عملت حسابك عليها دى كمان ؟

اتش : طبعا يا معلم .. هتدخل تلاقى ميشيل مكول هتفتكرها بتعاكس الباشا و هتفرمها قبل ما توصله

شون مايكلز : يخرب بيت كده .. ده أنت شرير أكتر من غسان مطر

اتش : تارك يا صاحبى .. و بدل ما استخسر فيك سنتين ورا بعض انك تكسر له الستريك أدينى كسرتها له غصب عنه مرتين بردو ..

تلمع عينا شون مايكلز فى سعادة و تشفى ..

اتش : لا و مش بس كده .. هخلليه يسيب البالطو الجديد و الكاب و الجوانتى ع الحلبة .. دول عهدة .. دا كان الاتفاق فى العقد اللى هو ماقراهوش لو خسر يرجع الحاجات دى كلها ..

شون مايكلز : بس تصدق حرام صعب عليا

اتش : يووووه .. يا سيدى هنبقى نصالحه بعد الماتش و هعزمكوا عند قويدر على حسابى .. يرضيك يعنى يتفق مع البت ستيف عليا ؟

شون مايكلز : لا لا عندك حق .. بس قلت لى الستريك هتتكسر مرة كمان دلوقتى ؟

ضحكات شريرة متقطعة ..

,, تم بحمد الله ,,

_ النهـــــــايــــــــــــة _

[nanosecond]

لم أتابع مصارعة منذ غلق منتدى الديفيدى العربى الا بعض الخطوط العريضة ..

لم أكتب منذ ذلك الوقت كوميديا أو مناقشات ..

مهما وصفت سعادتى و أنا أكتب هذا الموضوع و أعود .. و أنا أشاهد المينيا لأكتبه ..

شعور لا يمكن وصفه أبدا ..

أعلم تماما أنه ربما لن يشاهده أحد من أصدقائى القدامى و ربما لا يعرفنى أحد ..

ربما لن يقرأه أحد ..

و لكنى أشكر منتدى الديفيدى الجديد و Mr Diaa على هذا المنتدى الذى ذكرنى بمنتداى الحبيب و أتاح لى العودة و الكتابة و تلك السعادة التى أشعر بها .. و لو لمرة أخيرة J

شكرا جزيلا ..

خالص تحياتى

[MR D I A A]

أستاذتنا الفاضلة ....لك منا كل الثناء والتقدير ، بعدد قطرات المطر ، وألوان الزهر ، وشذى العطر ، على جهودك الثمينة والقيمة
من أجل الرقي بمسيرة منتدانا الجديد .

nanosecond معجب بهذا

[hassan_ayman22]

ياااااااااااااااااة يا استاذتى الفاضلة .. رجعتينا لايام زمان .. ايام مجد الديفيدى وعظمتة

بتمنى ان شاء الله الايام دى ترجع وباذن الله وحدة هاترجع بجهدنا وتعبنا وبفضل المولى عز وجل قبل كل شئ ..


توبيك حصرى ومميز منك كالعادة مثلما عودتينا وفى انتظار جديدك بامر الرحمن